Tuesday, November 9, 2010

സ്നേഹത്തുരുത്തുകള്‍ ....



വര്‍ഷങ്ങള്‍ക്ക് മുന്‍പാണ്....
അവധി ദിവസത്തിന്‍റെ ആലസ്യത്തിനു പിടികൊടുക്കാതെ കാലത്ത് പുറപ്പെട്ടു ന്റെ പ്രിയ സുഹൃത്തിനോടൊപ്പം..
എന്തിനാ ഒരു ഇന്‍റര്‍വ്യൂ നടത്തണം.. വല്യ എഡിറ്ററെന്നാ വിചാരം... പേരിന് ഒരു ലിറ്റില്‍ മാഗസിന്‍ ഉണ്ട്...നിളയോളം.
ചെറുപ്പത്തിന്‍റെ ആവേശത്തില്‍ - അന്നത്തെ ഏറ്റവും വലിയ സാഹിത്യ പ്രവര്‍ത്തനം നടത്തുന്നത് ഞങ്ങളാണെന്ന ഭാവത്തില്‍ ഒന്നും അല്ലാട്ടൊ ‍- ഞങ്ങള്‍ തുടങ്ങിയതാണ്.. പാതിവഴിയിലെവിടെയൊ നിന്നു പോയ ശ്രമങ്ങളില്‍ ഒന്ന്...
കൃഷ്ണേട്ടനെ കാണാനാണ് യാത്ര... പട്ടാമ്പിക്കടുത്ത് കൊപ്പം എന്ന സ്ഥലത്താണ് അഭയം. അഭയം ഒരു സ്നേഹ , സ്വാന്തന കേന്ദ്രം ആണ്... അനാഥകളുടേയും അഗതികളുടേയും അഭയ കേന്ദ്രം..
വൃദ്ധരും , വികലാംഗരും , ബുദ്ധിമാന്ദ്യം ഉള്ളവരുമായി ഒരു പാട് പേരവിടെ കൃഷ്ണേട്ടന്‍റെ സ്നേഹത്തണലില്‍ കഴിയുന്നു....കൂടെ തൊഴില്‍ പരിശീലന കേന്ദ്രവും മറ്റും... നടന്നു കണ്ടു എല്ലാം..അന്വേഷിച്ചപ്പോള്‍ കൃഷ്ണേട്ടന്‍ ഇല്ല അവിടെ ..കുറച്ച് അപ്പുറത്ത് മറ്റൊരു കേന്ദ്രമുണ്ട്... അഭയത്തിലെ വനിതാ അന്തേവാസികള്‍ക്കായുള്ളത്.. കൃഷ്ണേട്ടനും കുടുംബവും അവരോടൊപ്പമാണ് താമസം. എന്തായാലും കൃഷ്ണേട്ടനെ കാണാനായി വന്നതല്ലേ.. അങ്ങോട്ടു പോകാം എന്നുറപ്പിച്ചു. റോഡും , തോടും ഏതെന്ന് തിരിച്ചറിയാന്‍ പറ്റാത്ത വഴിയൊരുപാട് പിന്നിട്ട് അവിടെയെത്തി.. പച്ച പുതച്ച ഒരു പുരയിടം..!! കൃഷേണട്ടനെ കണ്ടു ഒരു ചെറിയ കൂരയില്‍ ആ പാവങ്ങളോടൊപ്പം സകുടുംബം കൃഷ്ണേട്ടനും... നിറഞ്ഞ ചിരിയോടെ , സ്നേഹത്തോടെ ഞങ്ങളെ എതിരേറ്റു സ്നേഹത്തിന്‍റെ ആ ആല്‍മരം..വലിപ്പച്ചെറുപ്പം നോക്കാതെ വാതോരാതെ കുറെ സംസാരിച്ചു..കമ്മ്യൂണിസം , നാടകം തുടങ്ങി ഒരുപാട് കാര്യങ്ങള്‍ ......അവസാനം അഭയത്തിലെത്തി....
കൃഷ്ണേട്ടന്പറഞ്ഞു തുടങ്ങി.... കനറാ ബാങ്കില്‍ ജോലി ചെയ്യുന്ന കാലം . ബാങ്കുകള്‍ ജനക്ഷേമം മുന്‍ നിര്‍ത്തി സാമൂഹ്യ സേവനം നടത്തുന്ന കാലം . കനറാ ബാങ്കില്‍ ഒരു പ്രൊജെക്റ്റ് വരുന്നു , ആര്‍ക്കെങ്കിലും താല്പര്യമെങ്കില്‍ സാമൂഹ്യ പ്രവാര്‍ത്തനത്തിനിറങ്ങാം.. ബാങ്ക് ശമ്പളം നല്‍കും , ചെറിയ രീതിയിലുള്ള സാമ്പത്തിക സഹായങ്ങളും...!! ഇ എം എസിനൊപ്പം ഒക്കെ പ്രവര്‍ത്തിച്ച പള്ളത്തിന്‍റെ ചെറുമോന് ആ വാഗ്ദാനം കേട്ടില്ലെന്ന് നടിക്കാനാവുമോ..? ചാടിയിറങ്ങി ഇങ്ങിനെ ഒരു പ്രൊജെക്റ്റുമായി... പാതിവഴിയിലെവിടെയോ ബാങ്കില്‍ നിന്നും അറിയിപ്പുണ്ടായി ഈ പദ്ധതി അവരവസാനിപ്പിക്കുന്നു എന്ന് എത്രയും പെട്ടെന്ന് വീണ്ടും ജൊലിയില്‍ പ്രവേശിക്കാന്‍ .....!! കൃഷ്ണേട്ടന്‍ എങ്ങിനെ പോകും കൃഷ്ണേട്ടനെ മാത്രം പ്രതീക്ഷിച്ച് ജീവിക്കുന്ന ഈ പാവങ്ങളെ എങ്ങിനെ ഉപേക്ഷിക്കും..? വേറൊന്നും ആലോചിച്ചില്ല വി ആര്‍ എസ് എടുത്തു...മാസാമാസം ലഭിച്ചിരുന്ന ശമ്പളം നിന്നു.. പിന്നെ പിടിച്ച് നില്ല്ക്കാനുള്ള പോരാട്ടമായിരുന്നു..കുറേ നിബന്ധനകളുണ്ടായിരുന്നു അപ്പോഴും... ആരില്‍ നിന്നും 5000 രൂപയ്ക്കു മുകളില്‍ സംഭാവന വാങ്ങില്ല തുടങ്ങി (ഇന്നും കൃഷ്ണേട്ടന്‍ അങ്ങിനെയൊക്കെ തന്നെയാവാം..)..... എന്നിട്ടും പിടിച്ച് നിന്നു കൃഷ്ണേട്ടന്‍ ....ഈ പ്രവര്‍ത്തികളെ മനസ്സറിഞ്ഞ് സഹായിക്കുന്ന ഒരുവളെ മറ്റൊന്നും നോക്കാതെ സഹധര്‍മ്മിണിയാക്കി.....
100 രൂപയുടെ ലൈഫ് ടൈം മെമ്പര്‍ഷിപ്പും എടുത്ത് അഭയത്തില്‍ നിന്നും ഇറങ്ങുമ്പോള്‍ രാത്രി ഏറെ വൈകിയിരുന്നു..അത്യാവശ്യം ക്ലബ്ബ് പ്രവര്‍ത്തനങ്ങളും , നാടകപ്രവര്‍ത്തനങ്ങളും നടത്തിയിരുന്ന , അതൊക്കെ വല്യ സാമൂഹ്യ പ്രവര്‍ത്തനമായി കണ്ടിരുന്ന എനിക്ക് ഞാനൊന്നും ഒന്നുമല്ലെന്ന് ആദ്യം ബോദ്ധ്യപ്പെടുത്തിതന്നത് കൃഷ്ണേട്ടനായിരുന്നു... ഇപ്പോഴും ഇടയ്ക്കിടെ ഓരോരുത്തര്‍ അങ്ങിനെ വീണ്ടും , വീണ്ടും പറയാതെ പറയുന്നു...കഴിഞ്ഞ മാസം ഇവിടെ ദുബായിയില്‍ കൂട്ടം രക്ത ദാനത്തോട് ബന്ധപ്പെട്ട് സ്നേഹത്താഴ്വര പ്രവര്‍ത്തകരുമായുള്ള കൂടിക്കാഴ്ചയായിരുന്നു അവസാനത്തേത്......!!


ഇതൊക്കെ ഇപ്പോള്‍ വീണ്ടും ഓര്‍ക്കാന്‍ കാരണം കഴിഞ്ഞ ദിവസം മാതൃഭൂമി വാരികയില്‍ വായിച്ച ഒരു ലേഖനമാണ്.. മുക്കത്ത് അശരണരുടെ ആശ്രയമായി പ്രവര്‍ത്തിക്കുന്ന ബി .പി മൊയ്തീന്‍ സേവാ മന്ദിര്‍ സ്വത്ത് തര്‍ക്കത്തിന്‍റെ ഭാഗമായി കുടിയൊഴിപ്പിക്കാന്‍ കോടതി ഉത്തരവായിരിക്കുന്നു..കുടിയൊഴിപ്പിക്കാന്‍ പോലീസിന്‍റെ അകമ്പടിയോടെ എത്തിയ ആമീന് നാട്ടുകാരുടെ ചെറുത്ത് നില്പിനെ തുടര്‍ന്ന് തല്‍കാലത്തേക്ക് തിരിച്ച് പോകേണ്ടി വന്നു.. ഇനിയും എന്നു വേണമെങ്കിലും അവര്‍ തിരിച്ച് വന്നേക്കാം.. കാഞ്ചനേടത്തിയും , കുറേ പാവങ്ങളുടെ പ്രതീക്ഷകളും എന്നു വേണമെങ്കിലും അവിടുന്ന് ആട്ടി ഇറക്കപ്പെട്ടേക്കാം.... ലക്ഷങ്ങള്‍ സര്‍ക്കാര്‍ ഗ്രാന്‍റ് വാങ്ങുന്ന കേന്ദ്രങ്ങളും , എസി കാറും , എസി ഫ്ലാറ്റും ഉപയൊഗിക്കുന്ന വമ്പന്‍ സ്രാവുകളുമല്ല മറിച്ച് കാരുണ്യത്തിന്‍റെയും , ദയയുടേയും ഇത്തരം ചെറിയ തുരുത്തുകളാണ് നിലനില്‍ക്കേണ്ടത്...


മനുഷ്യത്വം എന്ന വാക്ക് മരിക്കാതിരിക്കാന്‍ വേണ്ടിയെങ്കിലും ഇത്തരം സുമനസ്സുകളെ മാനസികമായെങ്കിലും പിന്തുണക്കേണ്ടത് നമ്മുടെ കടമയാണ്..!!

8 comments:

  1. മനുഷ്യത്വം എന്ന വാക്ക് മരിക്കാതിരിക്കാന്‍ വേണ്ടിയെങ്കിലും ഇത്തരം സുമനസ്സുകളെ മാനസികമായെങ്കിലും പിന്തുണക്കേണ്ടത് നമ്മുടെ കടമയാണ്..!!

    തീര്‍ച്ചയായും.... നമ്മുടെ കടമയാണ്......!!
    നന്നായി സമീ.........!!!

    ReplyDelete
  2. മാനസികമായെങ്കിലും ഇത്തരം സുമനസ്സുകളെ പിന്തുണക്കാൻ നമുക്ക് കഴിയട്ടെ....!

    അഭിനന്ദനങ്ങൾ സമീ ഈ ഓർമപെടുത്തലുകൾക്ക്.....!

    ReplyDelete
  3. ഓര്‍മ്മയിലെ യാത്രകള്ക്ക് നന്ദി സമീരന്‍...

    ReplyDelete
  4. സമി, നമുക്ക് ചെയ്യാന്‍ കഴിയുന്ന സഹായം നാം ചെയ്യണം. പലപ്പോഴും സഹായിക്കാന്‍ മുന്നിട്ടിറങ്ങുന്നവര്‍ പ്രശ്നങ്ങളില്‍ പെട്ടേക്കാം, ചീത്തപ്പേരും കിട്ടാറുണ്ട്. പക്ഷേ കൃഷ്ണേട്ടനേപ്പോലെ എന്തിനെയും എതിരിടാന്‍ ഉള്ള കരുത്തും ചങ്കൂറ്റവുമുണ്ടെങ്കില്‍ നമുക്ക് ഇതുപോലെ ധാരാളം നല്ല കാര്യങ്ങള്‍ ചെയ്യാന്‍ സാധിക്കും.

    നല്ല ചിന്തകള്‍. അഭിനന്ദനങ്ങള്‍ സമി.

    ReplyDelete
  5. മനസിന്റെ നന്മയുടെ വറ്റാത്ത ഉറവ അക്ഷരങ്ങളിലൂടെ ..ഓര്‍മ്മപെടുതലുകള്‍ അനിവാര്യമായ ലോകത്തില്‍ ..അത്രയെങ്കിലും നന്മ വിരിയട്ടെ ...സുമനസ്സിന്നു ഭാവുകങ്ങള്‍

    ReplyDelete
  6. എല്ലാ നന്മകള്‍ക്കും തുടര്‍ച്ചകളുണ്ടാവട്ടെ......

    ReplyDelete
  7. നന്മകള്‍ നേരുന്നു സുഹൃത്തെ...

    ReplyDelete
  8. സന്തോഷം സ്നേഹം സമീറിക്കാ. ഞങ്ങളുടെ കൃഷ്ണേട്ടനെ കുറിച്ച് ഓൺലൈനിലൂടെ വായിക്കുന്നതിൽ.!
    ആശംസകൾ.

    ReplyDelete

Related Posts Plugin for WordPress, Blogger...